امریکی صدر ڈونلڈ ٹرمپ نے واضح کیا ہے کہ ایران پر ہونے والے حالیہ حملے میں امریکہ کا کوئی کردار نہیں تھا، تاہم اگر ایران نے امریکہ یا اس کے مفادات کو نشانہ بنانے کی کوشش کی تو اسے ایسا شدید جواب دیا جائے گا جس کی دنیا نے کوئی مثال نہیں دیکھی ہوگی۔
ٹرمپ نے اپنے سوشل میڈیا پلیٹ فارم “ٹروتھ سوشل” پر بیان جاری کرتے ہوئے کہا کہ امریکہ ایران اور اسرائیل کے درمیان جاری تنازعے میں فریق نہیں ہے، لیکن کسی بھی ممکنہ ایرانی حملے کی صورت میں امریکی فوج پوری طاقت سے ردعمل دے گی۔
دلچسپ طور پر صدر ٹرمپ نے یہ دعویٰ بھی کیا کہ وہ ایران اور اسرائیل کے درمیان امن معاہدہ آسانی سے کروا سکتے ہیں، بشرطیکہ دونوں فریق مذاکرات کے لیے سنجیدگی کا مظاہرہ کریں۔
دوسری جانب ایران نے خبردار کیا ہے کہ اگر امریکہ اور اس کے اتحادی اسرائیل کی حمایت میں کسی بھی قسم کی مداخلت کرتے ہیں تو وہ خود بھی ایرانی جوابی کارروائیوں کا ہدف بن سکتے ہیں۔
