راولپنڈی کی انسداد دہشت گردی عدالت نے علیمہ خان کی عبوری ضمانت منظور کرتے ہوئے انہیں اشتہاری قرار دینے کا فیصلہ واپس لے لیا ہے۔ علیمہ خان، جو چیئرمین پی ٹی آئی کی ہمشیرہ ہیں، پر 26 نومبر کے احتجاجی مظاہرے کے کیس میں اشتہاری ہونے کا حکم جاری کیا گیا تھا۔
انہوں نے عدالت میں پیش ہو کر خود کو قانون کے حوالے کیا، جس پر جج امجد علی شاہ نے ان کی عبوری ضمانت منظور کرلی اور پولیس کو ان کی گرفتاری سے روک دیا۔ عدالت نے ایس ایچ او تھانہ صادق آباد کو نوٹس جاری کرتے ہوئے 21 مئی کو کیس کا مکمل ریکارڈ طلب کیا ہے۔
عدالت نے علیمہ خان کو تفتیش میں شامل ہونے کی ہدایت بھی دی اور ایک لاکھ روپے کے ضمانتی مچلکے جمع کرانے کا حکم جاری کیا۔
علیمہ خان نے اس دوران اڈیالہ جیل میں اپنے بھائی اور سابق وزیراعظم عمران خان سے ملاقات کی اجازت کے لیے بھی عدالت میں درخواست دائر کی ہے، جس میں انہوں نے مؤقف اختیار کیا ہے کہ موجودہ حالات ہنگامی اور غیر معمولی نوعیت کے ہیں، اس لیے انہیں بھائی سے ملاقات کی اجازت دی جائے۔
