گوجرانوالہ: انسداد دہشت گردی عدالت نے پی ٹی آئی کے لانگ مارچ 2022 کے دوران عمران خان پر حملے کے مقدمے کا فیصلہ سنا دیا۔
تفصیلات کے مطابق تھانہ سٹی وزیرآباد میں درج مقدمے کی سماعت کے بعد عدالت نے مرکزی ملزم نوید کو معظم کے قتل اور دہشت گردی کے الزامات میں دو بار عمر قید اور 15 لاکھ روپے جرمانے کی سزا سنائی۔
عدالت نے فائرنگ سے زخمی ہونے والے چار افراد کے معاملے میں نوید کو 3 سے 5 سال قید کی سزائیں بھی سنائیں۔
شریک ملزمان طیب جہانگیر بٹ اور وقاص کو شک کا فائدہ دیتے ہوئے بری کر دیا گیا۔
عمران عباس سپرا ایڈووکیٹ کے مطابق استغاثہ طیب جہانگیر بٹ کے خلاف کوئی گواہ پیش کرنے میں ناکام رہا۔
عدالتی فیصلے کے مطابق نوید کی تمام سزائیں ایک ساتھ چلیں گی۔ یاد رہے کہ 7 نومبر 2022 کو پی ٹی آئی کے لانگ مارچ کے دوران وزیرآباد میں فائرنگ کی گئی تھی جس میں عمران خان سمیت دیگر مقامی رہنما زخمی ہوئے تھے، جبکہ شہری معظم گولی لگنے سے جاں بحق ہو گیا تھا۔
ملزم نوید کو واقعے کے فوری بعد موقع پر ہی گرفتار کر لیا گیا تھا۔
