سرکاری اعداد و شمار کے مطابق پاکستان نے گزشتہ مالی سال کے دوران چین سے 1.7 ارب ڈالر کی ری فنانسنگ سمیت مجموعی طور پر 16.2 ارب ڈالر کے بیرونی قرضے حاصل کیے۔
نجی ٹی وی کی رپورٹ کے مطابق حکومت نے مالی سال کے دوران بیرونی قرضوں اور گرانٹس کی مد میں 19.92 ارب ڈالر حاصل کرنے کا ہدف مقرر کیا تھا، تاہم یہ ہدف مکمل نہ ہو سکا۔
دستاویزات کے مطابق پاکستان مقررہ ہدف کے مقابلے میں 3.72 ارب ڈالر کم فنڈز حاصل کر سکا، جس کے باعث بیرونی مالی وسائل کی وصولی طے شدہ سطح تک نہیں پہنچ سکی۔
رپورٹ میں بتایا گیا ہے کہ چین کے علاوہ مختلف بین الاقوامی مالیاتی اداروں نے بھی پاکستان کو قرضے اور مالی معاونت فراہم کی۔
سرکاری ریکارڈ کے مطابق ایشین ڈویلپمنٹ بینک (ADB) نے گزشتہ مالی سال کے دوران پاکستان کو 953.74 ملین ڈالر قرض فراہم کیا، جو کسی ایک مالیاتی ادارے کی جانب سے دی جانے والی سب سے بڑی رقم قرار دی گئی۔
