مائیکروسافٹ نے بالآخر اپنی مشہور ویڈیو کالنگ ایپ ‘اسکائپ’ کو آج سے بند کر دیا ہے، اور صارفین کو اپنی نئی ایپ ‘ٹیمز’ پر منتقل ہونے کی ہدایت کی ہے۔
میڈیا نیوز کے مطابق مائیکروسافٹ نے رواں سال فروری میں اسکائپ کو مرحلہ وار ختم کرنے کا اعلان کیا تھا۔ کمپنی کی ترجیح اب مائیکروسافٹ ٹیمز پر مرکوز ہے، جو حالیہ برسوں میں پیشہ ورانہ کانفرنس کالز اور آن لائن میٹنگز کے لیے مرکزی پلیٹ فارم کے طور پر ابھرا ہے۔
مائیکروسافٹ 365 کے صدر، جیف ٹیپر کے مطابق اسکائپ سے حاصل شدہ تجربات نے ‘ٹیمز’ کی ترقی میں کلیدی کردار ادا کیا۔ اُنہوں نے کہا کہ ایک جدید اور موثر سروس فراہم کرنے کے لیے کمپنی نے فیصلہ کیا کہ ایک ہی پلیٹ فارم پر توجہ مرکوز کرنا زیادہ فائدہ مند ہوگا۔
یاد رہے کہ اسکائپ کی بنیاد 2003 میں ایسٹونیا میں رکھی گئی تھی اور اسے بعد ازاں 2005 میں ای بے نے خریدا، جس نے 2011 میں مائیکروسافٹ کو فروخت کر دیا۔
