لاہور: لاہور ہائیکورٹ نے بانی پی ٹی آئی عمران خان کی بہن نورین نیازی کو این سی سی آئی اے کے درج مقدمے میں فوری گرفتاری سے تحفظ دیتے ہوئے ایک ہفتے کی حفاظتی ضمانت منظور کر لی۔
جسٹس سردار اکبر ڈوگر نے نورین نیازی کی درخواست پر سماعت کی، جس میں مؤقف اختیار کیا گیا کہ ان کے خلاف پریوینشن آف الیکٹرانک کرائمز ایکٹ (پیکا) کے تحت مقدمہ درج ہے اور عبوری ضمانت کے لیے متعلقہ عدالت میں پیش ہونا مقصود ہے، تاہم گرفتاری کا خدشہ موجود ہے۔
عدالت نے درخواست منظور کرتے ہوئے نورین نیازی کو ایک ہفتے کی حفاظتی ضمانت فراہم کی اور ہدایت کی کہ وہ مقررہ مدت کے اندر متعلقہ عدالت سے رجوع کریں۔
درخواست میں استدعا کی گئی تھی کہ متعلقہ عدالت میں پیش ہونے تک انہیں قانونی تحفظ فراہم کیا جائے تاکہ وہ بغیر گرفتاری کے اپنے قانونی حقوق استعمال کر سکیں۔
