اسلام آباد (کورٹ رپورٹر) ڈسٹرکٹ اینڈ سیشن کورٹ اسلام آباد نے بانی پاکستان تحریک انصاف عمران خان اور ان کی اہلیہ بشریٰ بی بی کی ضمانت قبل از گرفتاری میں توسیع کر دی۔ یہ توسیع 9 مئی اور دیگر مقدمات میں دی گئی۔
ایڈیشنل سیشن جج محمد افضل مجوکا کی عدالت میں کیس کی سماعت ہوئی، جہاں عمران خان کی چھ اور بشریٰ بی بی کی ایک درخواست ضمانت پر دلائل پیش کیے گئے۔ عدالت نے دونوں کو 28 اکتوبر تک گرفتار کرنے سے روک دیا اور ہدایت کی کہ آئندہ سماعت پر بانی پی ٹی آئی کو عدالت میں یا ویڈیو لنک کے ذریعے پیش کیا جائے۔
سماعت کے دوران جج افضل مجوکا نے اڈیالہ جیل انتظامیہ کو شوکاز نوٹس بھی جاری کرنے کا حکم دیا۔ عدالت نے ضمانت کی درخواستوں پر مزید کارروائی 28 اکتوبر تک ملتوی کر دی۔
یاد رہے کہ عمران خان کے خلاف 9 مئی کے واقعات، اقدام قتل اور جعلی رسیدوں سمیت کئی مقدمات درج ہیں۔ بشریٰ بی بی اور عمران خان کی قانونی نمائندہ شمسہ کیانی ایڈووکیٹ عدالت میں پیش ہوئیں۔
