اسلام آباد: وزیرِاعظم شہباز شریف نے ملک بھر میں مون سون بارشوں اور سیلاب کی موجودہ صورتحال کے پیشِ نظر مختلف سیاسی شخصیات سے رابطے کیے ہیں۔
وزیراعظم نے چیئرمین پاکستان پیپلز پارٹی بلاول بھٹو زرداری سے ٹیلی فون پر گفتگو کی اور جنوبی سندھ، خاص طور پر کراچی میں موسلادھار بارشوں کے نتیجے میں شہری علاقوں میں سیلاب اور جان و مال کے نقصان پر گہرے دکھ کا اظہار کیا۔
اس موقع پر شہباز شریف نے سندھ حکومت کو وفاقی حکومت کی جانب سے ہر ممکن تعاون کی یقین دہانی کرائی۔ انہوں نے این ڈی ایم اے کے چیئرمین کو ہدایت دی کہ وہ صوبائی حکومت کے ساتھ مکمل رابطے میں رہیں، صوبائی ڈیزاسٹر مینجمنٹ اتھارٹی کو ہر طرح کی مدد فراہم کریں اور عوام کو ممکنہ خطرات سے بروقت آگاہ کریں۔
وزیراعظم نے امیر جماعت اسلامی حافظ نعیم الرحمن سے بھی رابطہ کیا اور خیبرپختونخوا میں حالیہ بارشوں سے پیدا ہونے والے نقصانات اور جاری امدادی سرگرمیوں پر بات چیت کی۔ شہباز شریف نے الخدمت فاؤنڈیشن کے ریسکیو اور امدادی کاموں میں بھرپور حصہ لینے کو سراہا۔
اسی طرح وفاقی وزیر تعلیم و پیشہ ورانہ تربیت ڈاکٹر خالد مقبول صدیقی سے بھی ٹیلی فون پر بات ہوئی، جس میں سندھ میں حالیہ بارشوں اور آئندہ متوقع بارشوں کے خطرات پر تبادلہ خیال کیا گیا۔
وزیرِاعظم نے یقین دہانی کرائی کہ وفاقی حکومت کسی بھی ہنگامی صورتحال سے نمٹنے کے لیے این ڈی ایم اے اور دیگر وفاقی اداروں کے ذریعے صوبائی حکومتوں کے ساتھ مکمل تعاون کرے گی۔
