بالی ووڈ اداکارہ اور رکنِ پارلیمنٹ کنگنا رناوت نے بھارت کی جین زی کے بارے میں اپنے سابقہ بیان پر مؤقف تبدیل کرتے ہوئے نوجوان نسل کو ملک کی اہم طاقت اور قیمتی اثاثہ قرار دیا ہے۔
بھارتی میڈیا کے مطابق کنگنا رناوت نے چند روز قبل نئی دہلی کے جنتر منتر پر ہونے والے طلبہ کے احتجاج کے حوالے سے انسٹاگرام پر اپنے خیالات کا اظہار کیا تھا، جس میں انہوں نے جین زی کے لیے سخت الفاظ استعمال کیے اور اسے ’گٹر جنریشن‘ قرار دیا تھا۔
کنگنا کے اس بیان کے بعد سوشل میڈیا صارفین سمیت بھارتی شوبز انڈسٹری کی متعدد معروف شخصیات نے بھی انہیں تنقید کا نشانہ بنایا تھا۔
تاہم اب اداکارہ نے اپنے سابقہ مؤقف سے پیچھے ہٹتے ہوئے جین زی کو بھارت کی سب سے بڑی طاقت قرار دیا ہے۔
خبر رساں ادارے پی ٹی آئی سے گفتگو کرتے ہوئے کنگنا رناوت نے کہا کہ جنریشن زی بھارت کی طاقت اور قوم کا قیمتی اثاثہ ہے۔
ان کا کہنا تھا کہ یہ بات باعثِ خوشی ہے کہ ملک کے نوجوان تیزی سے اپنی ثقافت اور قومی شناخت کے سفیر کے طور پر سامنے آ رہے ہیں۔
کنگنا نے مزید کہا کہ انہیں موہن بھاگوت کو سننے کا موقع بھی ملا، جن کا وہ بہت احترام کرتی ہیں۔ ان کے مطابق یہ ایک مثبت بات ہے کہ بھارت کے نوجوان ان سے جڑ رہے ہیں اور اپنی ثقافتی شناخت کو اپنانے کی طرف بڑھ رہے ہیں۔
