بہاولپور (ڈسٹرکٹ رپورٹر ) مالی سال 2025-26 کی رجسٹریوں کا آڈٹ تاحال نہ ہو سکا، ریونیو نظام کی شفافیت پر سوالات کم شیڈول ریٹس، اراضی کی درجہ بندی اور ریونیو ریکارڈ میں مبینہ بے ضابطگیوں کی غیر جانبدارانہ تحقیقات کا مطالبہ مالی سال 2025-26 کے اختتام کے باوجود ضلع بہاولپور میں منظور ہونے والی رجسٹریوں کی جامع جانچ پڑتال اور خصوصی آڈٹ نہ ہونے پر شہری، قانونی اور کاروباری حلقوں نے تشویش کا اظہار کرتے ہوئے اعلیٰ حکام سے شفاف، غیر جانبدارانہ اور آزادانہ تحقیقات کا مطالبہ کیا ہے شکایات کے مطابق بعض رجسٹریوں میں محکمہ مال اور رجسٹری برانچ کے بعض اہلکاروں کی جانب سے موقع ملاحظہ، متعلقہ رپورٹس، اراضی کی درست نوعیت کے تعین اور دیگر قانونی تقاضوں پر مؤثر عمل درآمد نہ ہونے کے الزامات سامنے آئے ہیں۔ مزید یہ دعویٰ بھی کیا جا رہا ہے کہ بعض معاملات میں کم شیڈول ریٹس کی بنیاد پر رجسٹریوں کی منظوری سے قومی و صوبائی محصولات متاثر ہوئے۔ تاہم ان دعوؤں کی تاحال کسی سرکاری ادارے کی جانب سے باضابطہ تصدیق یا تردید سامنے نہیں آئی۔ ذرائع کے مطابق متعلقہ معاملات سے اعلیٰ حکام کو مختلف اوقات میں آگاہ کیا گیا مگر اب تک کسی جامع انکوائری یا خصوصی آڈٹ کے آغاز کی اطلاعات موصول نہیں ہوئیں۔ شکایت کنندگان کا مؤقف ہے کہ بعض رجسٹریوں میں نہری اراضی کو دریائی جبکہ بعض کمرشل اراضی کو رہائشی یا کم مالیت کے زمرے میں ظاہر کیے جانے کے باعث رجسٹری فیس، اسٹامپ ڈیوٹی اور دیگر ٹیکسوں کی وصولی متاثر ہونے کا خدشہ پیدا ہوا۔ اگر یہ الزامات تحقیقات میں درست ثابت ہوتے ہیں تو سرکاری خزانے کو مالی نقصان پہنچنے کے امکانات کو نظرانداز نہیں کیا جا سکتا شہری و قانونی حلقوں نے مطالبہ کیا ہے کہ مالی سال 2025-26 کے دوران منظور ہونے والی تمام رجسٹریوں، پٹواری رپورٹس، موقع ملاحظہ، شیڈول ریٹس، ایف بی آر ویلیو، اراضی کی درجہ بندی اور متعلقہ ریکارڈ کا جدید تقاضوں کے مطابق فرانزک، انتظامی اور مالیاتی آڈٹ کرایا جائے تاکہ حقائق غیر جانبدارانہ انداز میں عوام کے سامنے آ سکیں عوامی حلقوں کا کہنا ہے کہ اگر تحقیقات کے دوران کسی سرکاری اہلکار، پٹواری، رجسٹری برانچ کے ملازم یا کسی دوسرے ذمہ دار فرد کی غفلت، اختیارات کے ناجائز استعمال یا قواعد و ضوابط کی خلاف ورزی ثابت ہوتی ہے تو اس کے خلاف پنجاب لینڈ ریونیو قوانین اور دیگر متعلقہ قانونی ضوابط کے مطابق بلاامتیاز کارروائی عمل میں لائی جائے شہریوں نے ممبر بورڈ آف ریونیو پنجاب، سیکریٹری ریونیو پنجاب، کمشنر بہاولپور اور ڈپٹی کمشنر بہاولپور سے مطالبہ کیا ہے کہ مالی سال 2025-26 کے دوران منظور ہونے والی تمام رجسٹریوں کی شفاف، غیر جانبدارانہ اور آزادانہ جانچ کرائی جائے، متعلقہ ریکارڈ کا خصوصی آڈٹ مکمل کیا جائے اور تحقیقات کے نتائج عوام کے سامنے لائے جائیں تاکہ ریونیو نظام پر عوامی اعتماد مزید مستحکم ہو اور شفاف طرزِ حکمرانی کے تقاضے پورے کیے جا سکیں۔
