اسلام آباد: بشریٰ بی بی کی مبینہ قیدِ تنہائی کے خلاف اسلام آباد ہائیکورٹ میں باقاعدہ درخواست جمع کرا دی گئی ہے۔
درخواست بشریٰ بی بی کی صاحبزادی مبشرہ خاور مانیکا کی جانب سے بیرسٹر سلمان صفدر کے توسط سے دائر کی گئی، جس میں مؤقف اختیار کیا گیا ہے کہ ان کی والدہ کو غیر قانونی طور پر تنہائی میں رکھا جا رہا ہے۔
درخواست میں کہا گیا ہے کہ اس اقدام کے باعث بشریٰ بی بی کو آئین کے تحت حاصل بنیادی حقوق سے محروم کیا جا رہا ہے، جو قانونی اور آئینی تقاضوں کے منافی ہے۔
درخواست گزار نے عدالت سے استدعا کی ہے کہ بشریٰ بی بی کو قیدِ تنہائی میں رکھنے کے فیصلے کو غیر قانونی اور غیر آئینی قرار دیتے ہوئے کالعدم قرار دیا جائے۔
مزید یہ بھی درخواست کی گئی ہے کہ عدالت اس معاملے کا فوری نوٹس لے اور متعلقہ حکام کو قیدِ تنہائی کا سلسلہ ختم کرنے کے احکامات جاری کرے۔
