کراچی:حکومت ایم کیو ایم پاکستان کے تحفظات دور کرنے کے لیے متحرک ہوگئی، پارٹی کی جانب سے اقتدار چھوڑنے کی دھمکی کے بعد وفاقی وزیر منصوبہ بندی احسن اقبال نے سعودی عرب سے زوم میٹنگ کے ذریعے ایم کیو ایم قیادت سے رابطہ کیا۔
ذرائع کے مطابق، چیئرمین ایم کیو ایم پاکستان ڈاکٹر خالد مقبول صدیقی، مصطفیٰ کمال، میاں طاہر، جاوید حنیف اور اظہار الحسن نے اجلاس میں شرکت کی، جبکہ اسلام آباد میں موجود متعلقہ اداروں کے افسران بھی میٹنگ کا حصہ تھے۔
اجلاس میں کراچی اور حیدرآباد کے ترقیاتی منصوبوں پر تبادلہ خیال کیا گیا، وزیر صحت مصطفیٰ کمال بھی اسلام آباد سے زوم میٹنگ میں شریک ہوئے۔ احسن اقبال نے ایم کیو ایم قیادت کو جلد ترقیاتی منصوبے شروع کرانے کی یقین دہانی کرائی اور دیگر تحفظات بھی دور کرنے کا عندیہ دیا۔
واضح رہے کہ ایم کیو ایم پاکستان نے گزشتہ روز حکومتی رویے پر سخت ناراضی کا اظہار کرتے ہوئے اقتدار سے علیحدگی کی دھمکی دی تھی اور رابطہ کمیٹی کا ہنگامی اجلاس بھی طلب کیا تھا۔
ذرائع کے مطابق، حکومت نے کراچی کے لیے 15 ارب اور حیدرآباد کے لیے 5 ارب روپے کے ترقیاتی کاموں کی جلد تکمیل کی یقین دہانی کرائی ہے، جبکہ وزیر اعظم شہباز شریف عمرے کی ادائیگی کے بعد ایم کیو ایم قیادت سے براہ راست ملاقات بھی کریں گے۔
