لندن: ایران اور امریکا کے درمیان ممکنہ سفارتی پیش رفت کی امیدوں کے بعد عالمی منڈی میں خام تیل کی قیمتوں میں نمایاں کمی ریکارڈ کی گئی ہے۔
غیر ملکی میڈیا رپورٹس کے مطابق امریکی صدر ڈونلڈ ٹرمپ کی جانب سے ایران کے خلاف جاری فوجی کارروائیوں میں عارضی وقفہ دینے کے اعلان کے بعد عالمی آئل مارکیٹ میں خام تیل کی قیمتیں پانچ فیصد سے زیادہ گر گئیں۔
رپورٹس کے مطابق برینٹ خام تیل کی قیمت 5.58 ڈالر کمی کے بعد 91.20 ڈالر فی بیرل تک آ گئی، جبکہ امریکی ویسٹ ٹیکساس انٹرمیڈیٹ (WTI) خام تیل 4.91 ڈالر سستا ہو کر 84.40 ڈالر فی بیرل پر ٹریڈ ہونے لگا۔
ماہرین کا کہنا ہے کہ ایران اور امریکا کے درمیان کشیدگی میں ممکنہ کمی اور مذاکرات کے امکانات نے تیل کی سپلائی سے متعلق خدشات کم کیے ہیں، جس کے باعث عالمی مارکیٹ میں قیمتوں پر دباؤ آیا۔
دوسری جانب امریکی میڈیا کے مطابق صدر ڈونلڈ ٹرمپ نے ایران کے خلاف تقریباً 13 روز سے جاری حملوں میں وقفہ دینے کی ہدایت جاری کی ہے۔ تاہم یہ ابھی واضح نہیں کیا گیا کہ یہ فیصلہ صرف عارضی توقف ہے یا مستقل جنگ بندی کی جانب کوئی پیش رفت۔
