خوشاب: پنجاب کے ضلع خوشاب کی تحصیل نورپور تھل میں انسانیت سوز واقعہ پیش آیا جہاں چند اوباش نوجوانوں نے دو سگی بہنوں کو نشہ آور چیز دے کر مبینہ طور پر زیادتی کا نشانہ بنایا۔
پولیس ذرائع کے مطابق یہ افسوسناک واقعہ نورپور تھل کے نواحی گاؤں پیلو وینس میں پیش آیا۔ متاثرہ لڑکیاں اس وقت گھر میں تنہا موجود تھیں جب ملزمان محمد حسنین، عبدالرؤف، عمر فاروق اور محمد ایوب نے مبینہ طور پر ان کو نشہ آور چیز پلا کر باری باری زیادتی کی۔
نورپور تھل پولیس نے متاثرہ لڑکیوں کے والد کی درخواست پر مقدمہ درج کر لیا ہے۔ پولیس کے مطابق لڑکیوں کی عمریں 19 اور 22 سال ہیں۔
پولیس حکام کا کہنا ہے کہ نامزد ملزمان کی گرفتاری کے لیے مختلف مقامات پر چھاپے مارے جا رہے ہیں اور جلد انہیں قانون کے کٹہرے میں لایا جائے گا۔
