اسلام آباد: ڈپٹی اسپیکر قومی اسمبلی سید غلام مصطفیٰ شاہ نے وزیراعظم شہباز شریف اور وفاقی وزیر برائے پارلیمانی امور طارق فضل چوہدری کو خط لکھ کر پارلیمنٹ میں وفاقی وزراء کی عدم حاضری پر شدید تشویش کا اظہار کیا ہے۔ خط میں انہوں نے نشاندہی کی کہ وقفہ سوالات کے دوران وزراء کی غیر موجودگی ایک سنگین مسئلہ ہے، جسے فوری حل کیا جانا چاہیے۔ انہوں نے 20 مارچ کے اجلاس کا حوالہ دیتے ہوئے کہا کہ وزارت توانائی اور مواصلات کے وزراء اور پارلیمانی سیکریٹریز غیر حاضر رہے، جو پارلیمانی روایات کی کھلی خلاف ورزی ہے۔
ڈپٹی اسپیکر نے لکھا کہ وزراء کی غیر حاضری کے باعث اہم عوامی مسائل پر بحث ممکن نہیں ہو سکی، اور یہ رویہ ایوان کی کارروائی کے بنیادی مقصد کو متاثر کر رہا ہے۔ انہوں نے وزیراعظم سے معاملے کے فوری حل کا مطالبہ کرتے ہوئے کہا کہ آئین کے تحت اراکین کے سوالات کا جواب دینا کابینہ کی اجتماعی ذمہ داری ہے۔
