لاہور: پنجاب حکومت نے لاؤڈ اسپیکر ایکٹ کی خلاف ورزی کرنے اور غیر قانونی طور پر مقیم غیر ملکیوں کی معاونت کرنے والے افراد کے خلاف گھیرا تنگ کرنے کا فیصلہ کر لیا ہے۔
وزیراعلیٰ پنجاب مریم نواز کی زیر صدارت امن و امان سے متعلق اجلاس میں فیصلہ کیا گیا کہ کسی بھی فرد، جماعت یا کاروبار کو لاؤڈ اسپیکر کے استعمال کی اجازت نہیں دی جائے گی۔
اعلامیے کے مطابق لاؤڈ اسپیکر ایکٹ کی خلاف ورزیوں کی نگرانی کے لیے جدید ٹیکنالوجی اور سی سی ٹی وی کیمروں کا استعمال کیا جائے گا، جب کہ غیر قانونی غیر ملکیوں کی معاونت کرنے والوں کو سخت سزائیں دی جائیں گی۔
اجلاس میں بتایا گیا کہ سوشل میڈیا پر نفرت، جھوٹ اور اشتعال انگیزی پھیلانے والوں کے خلاف پیکا ایکٹ کے تحت کارروائی کی جائے گی۔ ڈیجیٹل پلیٹ فارمز پر نفرت انگیز مواد کی نگرانی کے لیے خصوصی یونٹس بھی فعال کر دیے گئے ہیں۔
مزید برآں، وزیراعلیٰ نے 65 ہزار سے زائد آئمہ کرام کے وظائف کے لیے انتظامات جلد مکمل کرنے کی ہدایت دی۔ اجلاس میں کہا گیا کہ فتنہ انگیز عناصر کے سوا کسی مذہبی جماعت پر کوئی پابندی نہیں ہوگی، اور ضابطہ اخلاق کے مطابق سرگرمیوں کو جاری رکھنے کی اجازت ہوگی۔
