پشاور میں پاکستان تحریک انصاف کا ایک اہم اجلاس جاری ہے جس میں صوبے کے نئے وزیر اعلیٰ کے انتخاب سے متعلق مشاورت ہو رہی ہے۔ ذرائع کے مطابق اجلاس میں سہیل آفریدی کو وزارتِ اعلیٰ کے لیے نامزد کرنے پر غور کیا جا رہا ہے۔
اجلاس میں مرکزی قیادت سمیت صوبائی رہنماؤں کو بھی طلب کیا گیا ہے۔ پی ٹی آئی کی پارلیمانی پارٹی کے ذرائع کے مطابق بانیِ پی ٹی آئی نے ہدایت جاری کی ہے کہ تمام مرکزی اور صوبائی رہنما ایک صفحے پر رہتے ہوئے فیصلے کریں۔
اطلاعات کے مطابق لیگل ٹیم سے وزیر اعلیٰ کے انتخاب کے حوالے سے مشاورت کی جائے گی جبکہ جنید اکبر، اسد قیصر اور بابر سلیم سواتی کو خصوصی ذمہ داریاں سونپی گئی ہیں۔
پارلیمانی ذرائع کے مطابق آئندہ 72 گھنٹوں میں نیا وزیر اعلیٰ منتخب کر لیا جائے گا۔ اجلاس میں اپوزیشن کی حکمتِ عملی اور موجودہ سیاسی صورتحال کا بھی تفصیلی جائزہ لیا گیا۔
مزید بتایا گیا ہے کہ بیرونِ ملک موجود خیبر پختونخوا حکومت کے ارکانِ اسمبلی کو فوری طور پر وطن واپس بلایا گیا ہے۔ عارف احمد زئی، نزیر عباسی، تاج محمد ترند اور آصف محسود وطن واپس پہنچ چکے ہیں تاکہ وزیر اعلیٰ کے انتخاب میں حصہ لے سکیں۔
ذرائع کے مطابق دو ارکانِ اسمبلی تاحال بیرون ملک ہیں، جنہیں فوری واپسی کی ہدایت کر دی گئی ہے، جبکہ شیر علی ارباب بھی واپس آ چکے ہیں۔
