اسلام آباد: وزیراعظم شہباز شریف اور آذربائیجان کے صدر الہام علیئیف کے درمیان ٹیلی فونک گفتگو ہوئی، جس کے دوران آذربائیجان کے صدر نے وزیراعظم پاکستان اور فیلڈ مارشل جنرل سید عاصم منیر کو “وکٹری ڈے پریڈ” میں شرکت کی باضابطہ دعوت دی۔
ذرائع کے مطابق وزیراعظم شہباز شریف 8 نومبر کو ایک روزہ دورے پر آذربائیجان جائیں گے۔ دورے کے دوران وزیراعظم اور فیلڈ مارشل جنرل عاصم منیر آذربائیجان کے “یومِ فتح” کی تقریبات میں شرکت کریں گے۔
بتایا گیا ہے کہ یومِ فتح کی تقریب میں ترکیہ کے صدر رجب طیب اردوان بھی شریک ہوں گے، جہاں تینوں رہنما — وزیراعظم شہباز شریف، جنرل عاصم منیر اور صدر اردوان — خصوصی مہمان ہوں گے۔
وزیراعظم شہباز شریف آذربائیجان کے صدر الہام علیئیف سمیت دیگر اعلیٰ قیادت سے ملاقاتیں بھی کریں گے۔
سفارتی ذرائع کا کہنا ہے کہ وزیراعظم کی ترکیہ کے صدر رجب طیب اردوان سے الگ ملاقات کا بھی امکان ہے۔
واضح رہے کہ آذربائیجان میں یومِ فتح کی تقریبات نگورنو کاراباخ کی آزادی اور آرمینیا کے خلاف تاریخی کامیابی کی یاد میں منائی جاتی ہیں۔ اس جنگ میں پاکستان اور ترکیہ نے آذربائیجان کی بھرپور حمایت کی تھی۔
