تل ابیب: اسرائیلی وزیراعظم بنیامین نیتن یاہو نے جنگ بندی کے باوجود واضح کیا ہے کہ غزہ میں فوجی کارروائی مکمل طور پر ختم نہیں ہوئی اور اسرائیل کو اب بھی بڑے سکیورٹی چیلنجز کا سامنا ہے۔
قوم سے خطاب میں نیتن یاہو نے کہا کہ دشمن دوبارہ منظم ہو کر حملوں کی تیاری کر رہے ہیں، لیکن اسرائیل مکمل تیاری کے ساتھ موجود ہے۔ ان کا کہنا تھا کہ جہاں بھی لڑائی ہوئی، اسرائیلی فوج کامیاب رہی ہے۔
انہوں نے مزید کہا کہ حالیہ کامیابیوں کے بعد اسرائیل کے لیے نئے مواقع پیدا ہوئے ہیں اور اگر قوم متحد رہے تو تمام چیلنجز پر قابو پایا جا سکتا ہے۔
بین الاقوامی تجزیہ کاروں نے کہا کہ نیتن یاہو کا یہ بیان جنگ بندی کے بعد امن کے عمل کے لیے منفی اشارہ ہے اور اس سے خطے میں کشیدگی دوبارہ بڑھنے کا خدشہ ہے۔
