عمان (اردن): اردن کے رائل انسٹیٹیوٹ آف اسٹریٹجک اسٹڈیز نے سال 2025 کے لیے دنیا کے 500 بااثر مسلم شخصیات کی فہرست جاری کی ہے، جس میں معروف پاکستانی عالمِ دین مفتی محمد تقی عثمانی کو مسلم دنیا کی دوسری سب سے بااثر شخصیت قرار دیا گیا ہے۔
رپورٹ کے مطابق قطر کے امیر شیخ تمیم بن حمد آل ثانی فہرست میں پہلے نمبر پر ہیں، جب کہ مفتی محمد تقی عثمانی کو علمی، فقہی اور اصلاحی خدمات کے باعث دوسرا درجہ دیا گیا ہے۔
پاکستان سے تعلق رکھنے والی دیگر ممتاز مذہبی شخصیات میں مولانا طارق جمیل، تبلیغی جماعت کے امیر مولانا نذرالرحمان اور دعوتِ اسلامی کے امیر مولانا الیاس قادری بھی شامل ہیں، جنہیں دینی و سماجی خدمات کے اعتراف میں فہرست کا حصہ بنایا گیا ہے۔
عالمی سطح پر ٹاپ 50 میں شامل دیگر اہم ناموں میں ایران کے سپریم لیڈر آیت اللہ سید علی خامنہ ای، ترکی کے صدر رجب طیب اردوان، سعودی فرمانروا شاہ سلمان بن عبدالعزیز، ولی عہد محمد بن سلمان، اور برکینا فاسو کے صدر کیپٹن ابراہیم تراورے شامل ہیں۔
مزید برآں، ملائیشیا کے وزیر اعظم انور ابراہیم، آذربائیجان کے صدر الہام علیوف، ترک انٹیلیجنس کے سربراہ ابراہیم قالن، فلسطینی رہنما خالد مشعل، اور شامی صدر احمد الشرع بھی فہرست میں جگہ پانے میں کامیاب رہے۔
پاکستان سے شامل دیگر بااثر شخصیات میں وزیر اعظم شہباز شریف، آرمی چیف جنرل سید عاصم منیر، میر شکیل الرحمان، صحافی حامد میر، حافظ نعیم الرحمان، عمران خان، ڈاکٹر عمر سیف اور ملالہ یوسفزئی کے نام بھی نمایاں ہیں۔
