محکمہ موسمیات نے پنجاب بھر کے شہریوں کو خوشخبری سناتے ہوئے آئندہ دنوں میں گرمی اور حبس کی شدت میں کمی اور بارشوں کی پیشگوئی کی ہے۔
ادارے کے مطابق اس وقت صوبے بھر میں موسم شدید گرم، خشک اور حبس زدہ ہے، اگرچہ درجہ حرارت میں معمولی کمی واقع ہوئی ہے، تاہم حبس نے موسم کی شدت کو برقرار رکھا ہوا ہے۔
لاہور میں آج کا کم سے کم درجہ حرارت 31 ڈگری سینٹی گریڈ جبکہ زیادہ سے زیادہ درجہ حرارت 39 ڈگری سینٹی گریڈ تک رہنے کا امکان ہے۔ تاہم محکمہ موسمیات کا کہنا ہے کہ لاہور میں گرد آلود ہواؤں کے ساتھ ہلکی بارش ہونے کا امکان ہے، جو موسم کو کچھ حد تک بہتر بنا سکتی ہے۔
دوسری جانب صوبائی ڈیزاسٹر مینجمنٹ اتھارٹی (PDMA) نے پنجاب بھر میں 23 جون تک تیز ہواؤں، آندھی، اور بارش کے امکانات کے پیش نظر الرٹ جاری کر دیا ہے۔
ماہرین موسمیات کے مطابق ایک نیا موسمیاتی سسٹم پاکستان میں داخل ہو چکا ہے، جو آئندہ دنوں میں گرمی کی شدت کو کم کرنے اور موسم کو خوشگوار بنانے میں مدد دے گا۔
