لاہور: پولیس نے لبرٹی خدمت مرکز میں لائسنس جاری کرنے کے عوض رشوت لینے والے گروہ کو گرفتار کر لیا۔ کارروائی کے دوران 3 ٹریفک وارڈنز سمیت 8 افراد کو حراست میں لیا گیا۔
ذرائع کے مطابق لائسنس بنوانے کے نام پر شہریوں سے رقم بٹورنے کی شکایات موصول ہونے پر خصوصی کارروائی کی گئی۔ مخبر کو بطور شہری 10 ہزار روپے دے کر خدمت مرکز بھیجا گیا، جہاں ٹاؤٹ نے رقم وصول کی اور وارڈنز سے کام کروانے کی یقین دہانی کے بعد مزید 15 ہزار روپے کا مطالبہ کیا۔
پولیس نے موقع پر چھاپہ مار کر 5 ٹاؤٹس کو رنگے ہاتھوں گرفتار کر لیا جبکہ ان کی نشاندہی پر وارڈن مبین، فاروق اور عمران کو بھی حراست میں لے لیا گیا۔ تینوں وارڈنز سے رشوت کی رقم برآمد کرلی گئی۔
پولیس حکام کے مطابق گرفتار اہلکار اور ٹاؤٹ شہریوں سے بھاری رقوم لے کر لائسنس بنوانے میں سہولت فراہم کرتے تھے۔ ملزمان کے خلاف مقدمہ درج کر کے محکمانہ تحقیقات شروع کر دی گئی ہیں۔
