اسلام آباد: وفاقی دارالحکومت میں غیر رجسٹرڈ فوڈ پوائنٹس اور ریسٹورنٹس کے خلاف سخت کارروائی کا فیصلہ کیا گیا ہے۔ اسلام آباد فوڈ اتھارٹی نے یکم دسمبر سے رجسٹریشن مہم شروع کرنے اور غیر رجسٹرڈ اداروں کے خلاف کریک ڈاؤن کرنے کا اعلان کر دیا۔
تفصیلات کے مطابق، فوڈ اتھارٹی نے تمام فوڈ پوائنٹس اور ریسٹورنٹس کو ہدایت کی ہے کہ وہ 30 نومبر تک لازمی طور پر اپنی رجسٹریشن مکمل کریں۔ اس کے بعد کسی بھی غیر رجسٹرڈ فوڈ پوائنٹ یا ریسٹورنٹ کو کام جاری رکھنے کی اجازت نہیں ہوگی۔
ڈائریکٹر فوڈ اتھارٹی کے مطابق، یکم دسمبر سے روزانہ کی بنیاد پر انسپکشنز کی جائیں گی، اور جو ادارے رجسٹریشن کے بغیر پائے گئے، انہیں فوری طور پر سیل کر دیا جائے گا اور بھاری جرمانے عائد کیے جائیں گے۔
انہوں نے تمام ریسٹورنٹ اور فوڈ پوائنٹ مالکان سے اپیل کی ہے کہ وہ 30 نومبر سے قبل رجسٹریشن مکمل کر کے کارروائی سے بچیں اور شہریوں کو محفوظ اور معیاری خوراک فراہم کرنے میں فوڈ اتھارٹی کے ساتھ تعاون کریں۔
