عراق کے جنوبی شہر نصیریہ کے قریب ایک مسافر بس کے الٹنے اور اس میں آگ لگنے کے نتیجے میں کم از کم 21 افراد جاں بحق جبکہ 19 افراد زخمی ہو گئے ہیں۔
غیر ملکی میڈیا رپورٹس کے مطابق حادثہ اس وقت پیش آیا جب بس ڈرائیور نے ہائی وے پر گاڑی کا کنٹرول کھو دیا، جس کے باعث بس الٹ گئی اور دیکھتے ہی دیکھتے آگ کی لپیٹ میں آ گئی۔
عراقی حکام کے مطابق حادثے میں جاں بحق افراد کی تصدیق موقع پر اور اسپتال میں کی گئی، جبکہ زخمیوں میں سے متعدد کی حالت تشویشناک بتائی جا رہی ہے۔
ریسکیو اداروں نے فوری طور پر موقع پر پہنچ کر آگ پر قابو پایا اور زخمیوں کو قریبی اسپتال منتقل کیا۔
عراقی وزیراعظم نے واقعے کی وجوہات جاننے کے لیے فوری تحقیقات کا حکم دیتے ہوئے مکمل رپورٹ طلب کر لی ہے۔
حکام کے مطابق حادثے کے بعد علاقے میں امدادی کارروائیاں مکمل کر لی گئی ہیں جبکہ مزید تفصیلات اکٹھی کی جا رہی ہیں۔
