دوحا: صدرِ مملکت آصف علی زرداری نے قطر کے دارالحکومت دوحا میں امیرِ قطر شیخ تمیم بن حمد الثانی سے اہم ملاقات کی، جس میں امیرِ قطر نے آئندہ سال کے اوائل میں پاکستان کا دورہ کرنے کا اعلان کیا۔
ملاقات کے دوران شیخ تمیم بن حمد الثانی نے کہا کہ قطر کو پاکستان اور اس کی کامیابیوں پر فخر ہے۔ انہوں نے پاکستانی کمیونٹی کے کردار کی تعریف کرتے ہوئے ان کی تعداد میں اضافے کی خواہش بھی ظاہر کی۔
صدر زرداری نے امیرِ قطر کو پاکستانی حکومت اور عوام کی جانب سے نیک تمناؤں کا پیغام پہنچایا۔ دونوں رہنماؤں نے تاریخی اور برادرانہ تعلقات کو مزید مضبوط کرنے کے عزم کا اعادہ کیا۔ اس موقع پر صدر زرداری نے قطر کی ترقی اور شیخ تمیم کی قیادت کو سراہا۔
امیرِ قطر نے پاکستان اور سعودی عرب کے درمیان دفاعی معاہدے کو خوش آئند اور بروقت اقدام قرار دیا اور کہا کہ پاکستان ایک اہم اور منفرد حیثیت رکھتا ہے جو چین، مغرب اور خلیجی ممالک سے مضبوط تعلقات رکھتا ہے۔
صدر زرداری نے امیرِ قطر کو دفاع، دفاعی پیداوار، زراعت اور غذائی تحفظ کے شعبوں میں باہمی تعاون بڑھانے کی تجویز پیش کی، جس پر امیرِ قطر نے اتفاق کرتے ہوئے متعلقہ حکام کو فوری رابطے کی ہدایت دی۔
صدر زرداری نے افغانستان سے متعلق قطر کے مثبت کردار اور دوحا مذاکرات کی میزبانی کو بھی سراہا۔ امیرِ قطر نے اس امید کا اظہار کیا کہ پاکستان اور افغانستان موجودہ مسائل حل کر کے خطے میں استحکام لائیں گے۔
ملاقات میں چیئرمین پیپلز پارٹی بلاول بھٹو زرداری اور پاکستانی سفیر بھی شریک تھے۔
