شاہین اور غوری نمائش کے لیے نہیں، بھارت ہوشیار رہے: حنیف عباسی

راولپنڈی میں پریس کانفرنس کرتے ہوئے وفاقی وزیر ریلوے حنیف عباسی نے بھارت کو دنیا کا سب سے بڑا دہشتگرد قرار دیا۔ ان کا کہنا تھا کہ پہلگام واقعے کو فالس فلیگ آپریشن کے ذریعے پاکستان پر تھوپنے کی کوشش کی جارہی ہے۔ انہوں نے واضح کیا کہ پاکستان نے شاہین اور غوری میزائل صرف نمائش کے لیے نہیں بنائے۔
حنیف عباسی نے کہا کہ بھارتی حکومت کا دہشتگردی میں ملوث ہونا دنیا پر عیاں ہے، گجرات میں مسلمانوں کے قتل عام سے لے کر کینیڈا میں سکھ رہنما کے قتل تک بھارت کے جرائم کی طویل فہرست ہے۔ ان کا کہنا تھا کہ پاکستان خود دہشتگردی کا شکار رہا ہے جبکہ بھارت عالمی سطح پر ایک دہشتگرد ریاست کے طور پر سامنے آیا ہے۔
انہوں نے الزام لگایا کہ پہلگام واقعے کے بعد ہزاروں کشمیری طلباء کو اغوا کر کے جعلی انکاؤنٹرز کی تیاری کی جارہی ہے۔ ساتھ ہی انہوں نے یہ بھی کہا کہ بھارت کی کوشش ہے کہ کشمیر میں مسلمانوں کی زمینیں ہتھیائی جائیں اور ان کی جگہ غیر مسلم آبادی کو بسایا جائے۔
وفاقی وزیر نے خبردار کیا کہ اگر بھارت نے آبی جارحیت کی تو پاکستان بھرپور جواب دے گا۔ نیشنل سیکیورٹی کونسل اور قومی قیادت نے یہ پیغام دے دیا ہے کہ اگر بھارت نے پانی بند کیا تو اسے جنگ تصور کیا جائے گا۔
انہوں نے کہا کہ پاکستان نے اپنے ایٹمی اثاثے محفوظ رکھے ہیں اور اگر بھارت نے کسی قسم کی مہم جوئی کی تو پوری قوم متحد ہو کر اس کا مقابلہ کرے گی۔ انہوں نے بتایا کہ ریلوے اسٹیشنز پر فرنٹ ڈیسک قائم کیے جاچکے ہیں اور ریلوے سروسز کو پاک فوج کے اختیار میں دے دیا گیا ہے۔
حنیف عباسی نے پاکستانی میڈیا کو سنجیدہ رویہ اختیار کرنے پر سراہا اور بھارتی میڈیا کو ’جوکر میڈیا‘ قرار دیتے ہوئے مشورہ دیا کہ مودی حکومت سنجیدگی اختیار کرے اور اپنے عوام کو پہلگام واقعے کی اصل حقیقت سے آگاہ کرے۔