رحیم یار خان (بیورورپورٹ،سٹی رپورٹر)انتظامیہ کی جانب سے سیلاب متاثرین کو باسی ناشتہ دینے کا انکشاف‘ دو بچوں اور 6 خواتین سمیت 8 افراد کی حالت غیر‘ میڈیکل کیمپ منتقل کردیاگیا‘ محکمہ فوڈ کی ٹیم موقع پر پہنچ گئی‘ اعلیٰ حکام سے نوٹس لینے کا مطالبہ۔ تفصیل کے مطابق گزشتہ روز موضع طیب بلوچ کے علاقہ میں سیلاب متاثرین کو انتظامیہ کی جانب سے دیا جانے والا باسی ناشتہ کھانے سے 2 بچوں اور 6 خواتین سمیت 8 افراد کی حالت غیر ہوگئی جن میں موضع پہوڑاں چاچڑاں شریف کے رہائشی 10 سالہ محمد‘ 11 سالہ اقصیٰ بی بی‘ 45 سالہ عذرا بی بی‘ 26 سالہ صدف بی بی‘ 50 سالہ ساجدہ بی بی‘ 24 سالہ شازمین بی بی‘ 56 سالہ منظور بی بی اور 52 سالہ ارشاد بی بی شامل ہیں جنہیں فوری طور پر طبی امداد کیلئے میڈیکل کیمپ منتقل کردیا گیا جہاں متاثرین کو طبی امداد فراہم کی جارہی ہے۔ اطلاع پاکر محکمہ فوڈ کی ٹیم بھی موقع پر پہنچ گئی۔ واضح رہے انتظامیہ کی جانب سے گورنمنٹ بوائز سکول چاچڑاں شریف میں قائم فلڈ ریلیف کیمپ میں صبح کا ناشتہ دیا گیا تھا جس میں روٹی اور ڈبے میں پیک چنے کھانے سے بچوں اور خواتین کی حالت بگڑی تھی جبکہ دیگر سیلاب متاثرین نے باسی ناشتہ نہیں کیا اور وہ محفوظ رہے۔ سیلاب متاثرین نے سنگین غفلت پروزیر اعلیٰ پنجاب مریم نواز شریف سے مطالبہ کیا کہ ذمہ داران کے خلاف سخت کارروائی عمل میں لائی جائے۔
