ریاض: سعودی عرب نے دنیا کا پہلا فضائی اسٹیڈیم تعمیر کرنے کا فیصلہ کر لیا ہے جسے ’’نیوم اسٹیڈیم‘‘ کا نام دیا گیا ہے۔ یہ جدید ترین منصوبہ زمین سے 350 میٹر (تقریباً 1150 فٹ) کی بلندی پر تعمیر کیا جا رہا ہے، جو دنیا کا پہلا اسکائی اسٹیڈیم ہوگا۔
عالمی میڈیا رپورٹس کے مطابق نیوم اسٹیڈیم کی تعمیر 2032 تک مکمل ہونے کی توقع ہے، اور امکان ظاہر کیا جا رہا ہے کہ فیفا ورلڈ کپ 2034 کے میچز بھی اسی مقام پر منعقد کیے جائیں گے۔
یہ منفرد اسٹیڈیم 46 ہزار تماشائیوں کے بیٹھنے کی گنجائش رکھے گا اور اسے مکمل طور پر قابلِ تجدید توانائی سے چلایا جائے گا، جس میں سورج، ہوا اور پانی سے حاصل ہونے والی توانائی استعمال ہوگی۔
رپورٹس کے مطابق نیوم اسٹیڈیم صرف کھیلوں تک محدود نہیں ہوگا بلکہ اسے ایک جدید ثقافتی، تفریحی اور سماجی مرکز کے طور پر بھی تیار کیا جا رہا ہے۔ یہاں مردوں اور خواتین کے پروفیشنل فٹبال کلبز کے ساتھ سال بھر مختلف عالمی ایونٹس منعقد کیے جائیں گے، جو سعودی عرب کے وژن 2030 کی ایک بڑی جھلک پیش کریں گے۔