خیبر پختونخوا میں سینیٹر شبلی فراز کی نشست پر ضمنی انتخاب کا شیڈول جاری

پشاور: الیکشن کمیشن نے تحریک انصاف کے سینیٹر شبلی فراز کی خالی نشست پر ضمنی انتخاب کا شیڈول جاری کردیا ہے۔
ریٹرننگ آفیسر کی جانب سے جاری کردہ نوٹس کے مطابق امیدوار کل سے اپنے کاغذاتِ نامزدگی جمع کرا سکیں گے، جو 9 اکتوبر تک وصول کیے جائیں گے۔
کاغذات جمع کرانے کا وقت صبح 8 بجکر 30 منٹ سے شام 4 بجکر 30 منٹ تک مقرر کیا گیا ہے۔
نوٹیفکیشن کے تحت امیدواروں کی حتمی فہرست 18 اکتوبر کو جاری ہوگی، جبکہ امیدوار 20 اکتوبر تک اپنے کاغذات واپس لے سکیں گے۔
واضح رہے کہ سینیٹر شبلی فراز کی خالی نشست پر ضمنی انتخاب 30 اکتوبر کو خیبر پختونخوا اسمبلی میں منعقد کیا جائے گا۔