اسلام آباد: وفاقی محتسب برائے انسداد ہراسانی نے خواتین کے حقوق کے لیے اہم فیصلہ جاری کرتے ہوئے زچگی کی چھٹی کے دوران خاتون کو نوکری سے نکالنا صنفی امتیاز قرار دیا ہے۔
وفاقی محتسب برائے انسداد ہراسانی (فوسپا) نے نجی کمپنی پر 10 لاکھ روپے جرمانہ عائد کیا۔ فوزیہ وقار کی سربراہی میں یہ فیصلہ زینب زہرہ اعوان کی درخواست پر سنایا گیا۔
فوسپا نے ہدایت کی کہ نجی کمپنی 8 لاکھ روپے متاثرہ خاتون کو معاوضے کے طور پر ادا کرے اور 2 لاکھ روپے قومی خزانے میں جمع کرائے۔
فیصلے کے مطابق، برطرفی کا حکم کالعدم قرار دیا گیا اور زینب زہرہ کو ان کی ملازمت میں بحال کر دیا گیا۔
وفاقی محتسب فوزیہ وقار نے کہا کہ ماں بننا کسی خاتون کے کیریئر میں رکاوٹ نہیں ہونا چاہیے، زچگی کے دوران ملازمت کا تحفظ خواتین کا بنیادی حق ہے اور ہر عورت کو محفوظ زچگی کا حق حاصل ہے۔
