اسلام آباد: وفاقی وزیر دفاع خواجہ آصف نے انکشاف کیا ہے کہ بھارت کابل حکومت کو مکمل طور پر سپورٹ کر رہا ہے اور افغان سرزمین کو پاکستان کے خلاف کارروائیوں کے لیے استعمال کیا جا رہا ہے۔
عرب ٹی وی کو دیے گئے خصوصی انٹرویو میں خواجہ آصف نے بتایا کہ بھارت اور افغان طالبان کے درمیان گہرے روابط موجود ہیں، اور طالبان بھارتی ایجنڈے کے تحت پاکستان کے خلاف کم شدت کی جنگ میں شریک ہیں۔
انہوں نے کہا کہ طالبان کے ایک وزیر کی بھارت میں موجودگی کے دوران دونوں ممالک کی سرحد پر جھڑپیں ہوئیں جن میں پاکستان کے کئی جوان شہید ہوئے۔ خواجہ آصف نے واضح کیا کہ پاکستان نے افغان جارحیت کا بھرپور جواب دیا ہے اور آئندہ بھی کسی ایسی کارروائی پر سخت ردعمل دیا جائے گا۔
وزیر دفاع نے مزید کہا کہ پاکستان اور بھارت کے درمیان کشیدگی کے دوران چند ماہ قبل ہونے والی جھڑپوں میں بھارت کو منہ توڑ جواب دیا گیا تھا، پاکستان نے اس کے 7 طیارے مار گرائے تھے، جس کی تصدیق خود امریکی صدر ڈونلڈ ٹرمپ نے بھی کی۔
خواجہ آصف نے خبردار کیا کہ اگر افغان سرزمین پاکستان کے خلاف دہشت گردی کے لیے استعمال کی گئی تو اسلام آباد خاموش نہیں بیٹھے گا۔ ان کا کہنا تھا کہ پاکستان ہمیشہ امن کا خواہاں رہا ہے، مگر اگر کابل نے تصادم کا راستہ اختیار کیا تو ہم اس کا بھرپور جواب دینے کی صلاحیت رکھتے ہیں۔
