اسلام آباد: پاکستان سپر لیگ کی فرنچائز ملتان سلطانز کی مینجمنٹ میں اہم تبدیلیوں کا امکان ظاہر کیا جا رہا ہے۔ ذرائع کے مطابق ٹیم کی قیادت کے لیے رمیز راجہ کو سربراہ مقرر کرنے پر غور کیا جا رہا ہے جبکہ کوچنگ اسٹاف میں عبدالرزاق، مشتاق احمد اور توفیق عمر کے شامل ہونے کی توقع ہے۔
ذرائع نے بتایا کہ پاکستان کرکٹ بورڈ (پی سی بی) نے دو تین دیگر کرکٹرز سے بھی دستیابی کے لیے رابطے کیے ہیں۔ عبدالرزاق کو ہیڈ کوچ، مشتاق احمد کو اسسٹنٹ کوچ اور توفیق عمر کو بیٹنگ کوچ کے عہدے کی پیشکش کی جا سکتی ہے۔
پی سی بی چیئرمین محسن نقوی کی حتمی منظوری کے بعد ملتان سلطانز کی مینجمنٹ کو فائنل شکل دی جائے گی۔ عبدالرزاق این سی اے میں پاور ہٹنگ کوچ کی ذمہ داری انجام دے چکے ہیں، توفیق عمر ویمنز کرکٹ ٹیم کے بیٹنگ کوچ رہ چکے ہیں جبکہ مشتاق احمد ملتان سلطانز کے ساتھ اسپن کنسلٹنٹ کے طور پر کام کا تجربہ رکھتے ہیں۔
واضح رہے کہ پی ایس ایل 11 میں ایک سال کے لیے ملتان سلطانز کے تمام معاملات پی سی بی مینجمنٹ دیکھے گی، جس کے بعد فرنچائز کی نیلامی ہوگی۔ ملتان سلطانز کے مالک علی ترین نے پی ایس ایل رینیول لیٹر نہ ملنے پر ٹیم کو خیر باد کہہ دیا اور پی ایس ایل مینجمنٹ پر تنقید کرتے ہوئے قانونی نوٹس کی کاپی پھاڑ دی تھی۔
پی ایس ایل کا گیارہواں ایڈیشن مارچ میں شروع ہوگا اور دو نئی ٹیموں کی خریداری کے لیے دس پارٹیوں میں مقابلہ ہوگا۔ نیلامی کی تقریب 8 جنوری کو جناح اسپورٹس کمپلیکس اسلام آباد میں منعقد ہوگی۔
