اسلام آباد: نائب وزیراعظم و وزیرِ خارجہ اسحاق ڈار 6 نومبر کو ہونے والے پاک افغان مذاکرات سے قبل ترکی کے دورے پر روانہ ہوں گے۔
ذرائع کے مطابق اسحاق ڈار ترک وزیرِ خارجہ حاقان فیدان کی دعوت پر آئندہ ہفتے کے اوائل میں انقرہ پہنچیں گے۔ وہ ترکی میں قیام کے دوران غزہ کی صورتحال پر ہونے والے 8 وزرائے خارجہ کے اہم اجلاس میں پاکستان کی نمائندگی کریں گے۔
یہ اجلاس اقوام متحدہ کی جنرل اسمبلی کے سائیڈ لائنز پر ہونے والے سفارتی رابطوں کے فالو اپ کے طور پر منعقد کیا جا رہا ہے، جس میں مشرق وسطیٰ کی تازہ صورتحال اور فلسطینی عوام کے تحفظ سے متعلق اہم فیصلے متوقع ہیں۔
ذرائع کے مطابق پاک افغان ڈائیلاگ سے قبل اسلام آباد میں سفارتی سرگرمیوں میں نمایاں تیزی دیکھی جا رہی ہے اور پاکستان خطے میں ایک متحرک سفارتی کردار ادا کر رہا ہے۔
