صوبائی وزیر اطلاعات عظمیٰ بخاری نے کہا ہے کہ پنجاب حکومت کسی مذہبی جماعت کے خلاف نہیں بلکہ اُن عناصر کے خلاف کارروائی کر رہی ہے جو ملک میں انتشار اور بدامنی پھیلانے کی کوشش کرتے ہیں۔
نجی ٹی وی سے گفتگو میں عظمیٰ بخاری نے کہا کہ تحریک لبیک پاکستان (ٹی ایل پی) کو ایک منظم منصوبے کے طور پر متحرک کیا گیا تھا، مگر اس کی سرگرمیاں سیاسی احتجاج کے بجائے امن و امان خراب کرنے کی کوششیں تھیں، جنہیں کسی صورت برداشت نہیں کیا جا سکتا۔
انہوں نے مزید کہا کہ ماضی میں کچھ جماعتیں پابندی کے بعد نام بدل کر دوبارہ سرگرم ہو جاتی تھیں، لیکن اب حکومت نے اس عمل کو روکنے کے لیے ایک خصوصی پراسیکیوشن سیل قائم کیا ہے تاکہ ثبوتوں کی بنیاد پر تحقیقات اور مقدمات کی قانونی پیروی کو تیز کیا جا سکے۔
عظمیٰ بخاری کے مطابق اطلاعات ہیں کہ ٹی ایل پی کی قیادت اس وقت پنجاب میں موجود نہیں، وہ گرفتاری سے بچنے کے لیے مسلسل جگہیں تبدیل کر رہے ہیں۔ تاہم، قانون نافذ کرنے والے ادارے ان کا سراغ لگا رہے ہیں اور جلد اہم گرفتاریاں متوقع ہیں۔
