اسلام آباد: ڈی جی ایف آئی اے رفعت مختار راجا کی ہدایت پر حوالہ ہنڈی اور غیر قانونی کرنسی ایکسچینج میں ملوث افراد کے خلاف کریک ڈاؤن جاری ہے۔ رواں سال ملک بھر میں غیر قانونی کرنسی ایکسچینج اور حوالہ ہنڈی میں ملوث نیٹ ورکس کے خلاف 384 چھاپے مارے گئے۔
ایف آئی اے کے ترجمان کے مطابق حوالہ ہنڈی اور کرنسی ایکسچینج میں ملوث افراد کے خلاف 396 مقدمات درج کیے گئے ہیں، جبکہ کارروائیوں کے دوران 494 ملزمان کو گرفتار کیا گیا اور ملزمان سے مجموعی طور پر 1 ارب 49 کروڑ روپے ریکور کیے گئے ہیں۔
برآمد کی گئی کرنسی میں 4 لاکھ 66 ہزار سے زائد امریکی ڈالر شامل ہیں اور دیگر غیر ملکی کرنسی کی مالیت 23 کروڑ روپے سے زائد ہے۔ ترجمان کے مطابق برآمد شدہ کرنسی میں 1 ارب 13 کروڑ پاکستانی روپے بھی شامل ہیں۔ ملک گیر چھاپوں کے دوران متعدد دکانیں سیل کی گئیں اور ملوث نیٹ ورکس کے خلاف زیرو ٹالرنس پالیسی کے تحت کارروائیاں جاری رہیں گی۔
