لاہور: سیکریٹری ماحولیات پنجاب صلوت سعید کی ہدایات پر سی ایم پنجاب گرین کریڈٹ پروگرام کے تحت ای بائیکس کی رجسٹریشن میں خاطر خواہ اضافہ ریکارڈ کیا گیا ہے۔
ترجمان محکمہ ماحولیات پنجاب ساجد بشیر کے مطابق گزشتہ آٹھ ماہ میں رجسٹرڈ ای بائیکس کی تعداد 1248 تک پہنچ گئی ہے، جبکہ صرف اگست 2025 میں ہی 755 نئی ای بائیکس کا اندراج ہوا۔
ان کا کہنا تھا کہ ای بائیکس کے استعمال سے دھوئیں، شور اور ٹریفک دباؤ میں واضح کمی آرہی ہے۔ اس اسکیم کے تحت شہریوں کو 5 گرین کریڈٹ کی سہولت دی جا رہی ہے، جس کے تحت ای بائیک کی خریداری اور رجسٹریشن پر 50 ہزار روپے براہِ راست بینک اکاؤنٹ یا موبائل والٹ میں منتقل کیے جاتے ہیں۔
مزید بتایا گیا کہ دوسری قسط کے طور پر 50 ہزار روپے کے اجرا کے لیے شہریوں کو 6 ماہ کے دوران 6 ہزار کلومیٹر کا سفر مکمل کرنا لازمی ہے، جس کا ڈیٹا گرین کریڈٹ ایپ پر اپ لوڈ کرنا ہوگا۔ اس طرح مجموعی طور پر ایک لاکھ روپے فراہم کیے جائیں گے۔
ساجد بشیر نے کہا کہ ای بائیکس نہ صرف ماحول دوست ہیں بلکہ یہ کم اخراج والی ٹرانسپورٹ کا مستقبل بھی ہیں۔ اس پروگرام کے ذریعے سالانہ ہزاروں ٹن کاربن ڈائی آکسائیڈ کے اخراج میں کمی متوقع ہے، جبکہ پنجاب حکومت کا ہدف ہے کہ 2030 تک صوبے کی 30 فیصد ٹرانسپورٹ کو الیکٹرک پر منتقل کیا جائے۔
