اسلام آباد: ڈاکٹر عافیہ صدیقی کی رہائی سے متعلق درخواست پر اہم پیش رفت سامنے آئی ہے۔ عدالت نے کیس کی سماعت کے لیے 10 ستمبر کی تاریخ مقرر کرتے ہوئے کاز لسٹ جاری کر دی ہے۔
ذرائع کے مطابق اسلام آباد ہائی کورٹ میں وزیر اعظم اور کابینہ کے خلاف عدالتی حکم عدولی پر توہین عدالت کے نوٹس بھی زیر سماعت ہوں گے۔ اس کیس کے لیے ہائی کورٹ نے 4 رکنی لارجر بینچ تشکیل دیا ہے جس کی سربراہی جسٹس ارباب محمد طاہر کریں گے۔
بینچ میں جسٹس خادم حسین سومرو، جسٹس اعظم خان اور جسٹس راجہ انعام امین منہاس بھی شامل ہیں۔ اس سے قبل یکم ستمبر کو جسٹس انعام امین منہاس نے کیس کی فائل چیف جسٹس کو بھیج کر لارجر بینچ تشکیل دینے کی سفارش کی تھی۔
یاد رہے کہ پہلے یہ کیس جسٹس سردار اعجاز اسحاق خان کی عدالت میں سماعت کے لیے مقرر تھا، جنہوں نے وزیر اعظم اور کابینہ ارکان کو توہین عدالت کے نوٹس جاری کیے تھے۔ تاہم ان کے ٹیکس کیسز کے لیے خصوصی ڈویژن بینچ میں شامل ہونے کے بعد یہ کیس دیگر ججز کو منتقل کر دیا گیا۔
