بھارت نے ستلج میں پانی چھوڑ دیا، جنوبی پنجاب میں چناب کے سیلاب کا خطرہ بڑھ گیا

لاہور: پنجاب کے دریاؤں میں طغیانی جاری ہے اور بھارت نے دریائے ستلج میں مزید پانی چھوڑ دیا ہے جس کے باعث ہریکے اور فیروزپور میں شدید سیلاب کا خدشہ بڑھ گیا ہے۔ بھارتی ہائی کمیشن نے پاکستان کو مطلع کیا اور وزارت آبی وسائل کو آج صبح 8 بجے سیلابی ریلے سے آگاہ کیا۔ گزشتہ روز بھی بھارت نے دریائے ستلج میں پانی کا بڑا ریلا چھوڑا تھا۔ پی ڈی ایم اے پنجاب نے دریائے ستلج کے قریب اضلاع کی انتظامیہ کو ہائی الرٹ رہنے کی ہدایات جاری کر دی ہیں۔ ہریکے زیریں اور فیروزپور زیریں میں اونچے درجے کی سیلابی صورتحال ہے۔ پی ڈی ایم اے کے ترجمان کے مطابق دریائے ستلج گنڈا سنگھ والا کے مقام پر پانی کا بہاؤ 2 لاکھ 53 ہزار کیوسک اور سلیمانکی پر 1 لاکھ 24 ہزار کیوسک ریکارڈ کیا گیا ہے۔ دریائے چناب میں بڑا سیلابی ریلا جنوبی پنجاب کی طرف بڑھ رہا ہے، مرالہ پر پانی کا بہاؤ 96 ہزار کیوسک، خانکی ہیڈ ورکس پر 1 لاکھ 20 ہزار کیوسک اور قادرآباد پر 1 لاکھ 35 ہزار کیوسک ہے۔ ہیڈ تریموں پر انتہائی اونچے درجے کا سیلاب ہے اور پانی کا بہاؤ 5 لاکھ 16 ہزار کیوسک تک پہنچ گیا ہے۔ دریائے راوی جسر پر 54 ہزار کیوسک اور شاہدرہ پر 60 ہزار کیوسک پانی بہ رہا ہے جبکہ بلوکی ہیڈ ورکس پر 1 لاکھ 37 ہزار کیوسک اور ہیڈ سدھنائی پر 1 لاکھ 7 ہزار کیوسک ہے۔ ریلیف کمشنر پنجاب نبیل جاوید کا کہنا ہے کہ 5 ستمبر تک راوی، ستلج اور چناب میں انتہائی اونچے درجے کے سیلاب کا خطرہ موجود ہے اور بالائی علاقوں میں بارش کے باعث دریاؤں میں غیر معمولی اضافہ ہو سکتا ہے۔ وزیر اعلیٰ پنجاب کی ہدایات کے مطابق تمام متعلقہ محکمے الرٹ ہیں اور شہریوں کی جان و مال کے تحفظ کے لیے تمام وسائل بروئے کار لائے جا رہے ہیں۔