وفاقی وزیر داخلہ محسن نقوی سے پاکستان میں برطانوی ہائی کمشنر جین میریٹ نے ملاقات کی۔ اس ملاقات میں دوطرفہ تعلقات، سکیورٹی تعاون، انسداد دہشت گردی، انسداد منشیات، بارڈر سکیورٹی اور انسانی اسمگلنگ کے خلاف اقدامات سمیت مختلف شعبوں میں تعاون بڑھانے پر تبادلہ خیال کیا گیا۔
برطانوی ہائی کمشنر نے محسن نقوی کو حال ہی میں ملنے والے نشانِ امتیاز پر مبارکباد دی اور ان کے لیے نیک خواہشات کا اظہار کیا۔ ملاقات کے دوران پاکستان میں حالیہ بارشوں اور سیلاب سے ہونے والے جانی نقصانات پر بھی گفتگو ہوئی، جس پر جین میریٹ نے جاں بحق افراد کے لواحقین سے ہمدردی اور تعزیت کا اظہار کیا۔
اس موقع پر وزیر داخلہ محسن نقوی نے کہا کہ پاکستان ہمیشہ امن کا خواہاں رہا ہے اور دہشت گردی کی ہر صورت کی مذمت کرتا ہے۔ انہوں نے مزید کہا کہ برطانیہ پاکستان کے ترقیاتی سفر میں ایک اہم شراکت دار ہے اور ہم باہمی مفاد کے تمام شعبوں میں دوطرفہ تعاون کو مزید فروغ دینا چاہتے ہیں۔
