اسلام آباد: 9 مئی سے متعلق کیسز میں پاکستان تحریک انصاف کے بانی عمران خان کے وکیل سلمان صفدر نے کہا ہے کہ چیف جسٹس پاکستان یحییٰ آفریدی سے ملاقات سنہرا موقع تھا جس سے بھرپور فائدہ اٹھایا گیا اور عمران خان کے کیسز کا معاملہ اٹھایا گیا۔
سلمان صفدر نے میڈیا سے گفتگو کرتے ہوئے بتایا کہ ملاقات میں اسپیشل پراسیکیوٹر ذوالفقار نقوی اور پنجاب پراسکیوشن ڈیپارٹمنٹ کے وکیل بھی موجود تھے۔ ملاقات میں چیف جسٹس کو بانی پی ٹی آئی اور ان کی اہلیہ کو جیل سہولیات نہ ملنے کے بارے میں آگاہ کیا گیا۔
چیف جسٹس نے کہا کہ جیل سہولیات کا معاملہ قومی عدالتی پالیسی ساز کمیٹی کی ترجیح ہے اور جیل اصلاحات سے متعلق معاملہ پہلے سے زیر غور ہے۔
سلمان صفدر نے مزید کہا کہ اسلام آباد ہائی کورٹ میں بانی پی ٹی آئی کے مقدمات کی سماعت نہ ہونے اور غیر مساوی سلوک کے بارے میں چیف جسٹس کو آگاہ کیا۔ ان کے مطابق 300 سے زائد مقدمات بانی پی ٹی آئی پر بنائے گئے، لیکن آج 8 کیسز میں ضمانت ملی ہے۔ القادر ٹرسٹ کیس ان کے خلاف آخری کیس ہے جس کی سماعت صرف چند منٹوں میں مکمل ہو جائے گی۔
