اسلام آباد: پاکستان تحریک انصاف (پی ٹی آئی) کی سیاسی کمیٹی نے فیصلہ کیا ہے کہ وہ آئندہ ضمنی انتخابات میں بھرپور طور پر حصہ لے گی۔
پارٹی ذرائع کے مطابق یہ فیصلہ تحریک انصاف کی کور کمیٹی کے اجلاس میں کیا گیا، جس کی صدارت سلمان اکرم راجہ نے کی۔
ذرائع نے بتایا کہ سیاسی کمیٹی نے متفقہ طور پر فیصلہ کیا ہے کہ پارٹی کسی بھی سیاسی فورم کو خالی نہ چھوڑے اور انتخابی میدان میں فعال رہے۔
کمیٹی نے سفارش کی ہے کہ اگر کسی نشست پر پارٹی کا موجودہ رکن سزا کے باعث نااہل ہو جائے، تو اسی رکن کی مشاورت سے متبادل امیدوار کا نام تجویز کیا جائے۔
اجلاس میں اپوزیشن لیڈر کی نامزدگی پر بھی بات ہوئی، تاہم کمیٹی نے سفارش کی کہ نئی نامزدگی عدالتی فیصلے تک ملتوی کی جائے۔
ذرائع کے مطابق کمیٹی نے یہ تجویز دی ہے کہ عدالتی فیصلے کے بعد اپوزیشن لیڈر کا انتخاب پی ٹی آئی کے اندر سے ہی کیا جائے۔
ذرائع نے مزید بتایا کہ کمیٹی کے بیشتر ارکان نے محمود خان اچکزئی کو اپوزیشن لیڈر نامزد کرنے کی مخالفت کی ہے اور مؤقف اختیار کیا ہے کہ موجودہ عدالتی عمل مکمل ہونے کے بعد ہی نئی قیادت کا تعین کیا جائے۔
