اسلام آباد اور خیبر پختونخوا میں زلزلے کے شدید جھٹکے، شہریوں میں خوف و ہراس

وفاقی دارالحکومت اسلام آباد اور خیبر پختونخوا کے متعدد علاقوں میں آج زلزلے کے شدید جھٹکے محسوس کیے گئے۔
ذرائع کے مطابق جھٹکے اسلام آباد، راولپنڈی، پشاور، سوات، ایبٹ آباد اور چترال میں بھی محسوس کیے گئے، جس کے باعث شہری خوفزدہ ہو کر گھروں اور دفاتر سے باہر نکل آئے۔
محکمہ موسمیات کے مطابق زلزلے کی شدت ریکٹر اسکیل پر 5.2 ریکارڈ کی گئی، اور اس کا مرکز افغانستان کے ہندوکش پہاڑی سلسلے میں تھا۔
زلزلہ صبح 10 بج کر 20 منٹ پر آیا اور اس کی گہرائی 190 کلومیٹر ریکارڈ کی گئی۔
زلزلے کے جھٹکوں کے دوران لوگ گھروں، دکانوں اور دفاتر سے باہر نکل کر کلمہ طیبہ کا ورد کرتے ہوئے سڑکوں پر آئے۔
ابتدائی اطلاعات کے مطابق کسی بھی قسم کے جانی یا مالی نقصان کی اطلاع موصول نہیں ہوئی۔