کوئٹہ: حکومت بلوچستان نے گلگت بلتستان اور خیبر پختونخوا کے سیلاب متاثرہ علاقوں کے لیے امدادی سامان کی ایک بڑی کھیپ روانہ کر دی ہے۔
ترجمان بلوچستان حکومت شاہد رند اور ڈی جی پی ڈی ایم اے جہانزیب خان نے تصدیق کی کہ بلوچستان حکومت کی جانب سے 1500 خاندانوں کے لیے گلگت بلتستان اور 1000 خاندانوں کے لیے خیبر پختونخوا کے متاثرین کے لیے امدادی سامان بھیجا گیا ہے۔
وزیر اعلیٰ بلوچستان میر سرفراز بگٹی کی ہدایت پر یہ امدادی کھیپ فوری طور پر متاثرہ علاقوں تک پہنچائی گئی تاکہ سیلاب زدگان کی فوری ضروریات کو پورا کیا جا سکے۔
امدادی سامان میں خیمے، کمبل، پانی کی بوتلیں اور دیگر بنیادی ضروریات شامل ہیں۔ شاہد رند نے کہا کہ بلوچستان حکومت مشکل کی اس گھڑی میں گلگت بلتستان اور خیبر پختونخوا کے عوام کے ساتھ کھڑی ہے اور امدادی کارروائی حکومت کی انسانی ہمدردی اور یکجہتی کا عملی ثبوت ہے۔
جہانزیب خان نے کہا کہ بھیجا گیا سامان معیاری اور جانچ شدہ ہے تاکہ متاثرہ خاندانوں کی ضروریات کے مطابق اس کی افادیت یقینی بنائی جا سکے۔
