پی ٹی آئی کے عہدیداران اور کارکنان بڑی تعداد میں پیپلز پارٹی میں شامل

گورنر پنجاب سردار سلیم حیدر نے کہا ہے کہ پاکستان پیپلز پارٹی عوام میں تیزی سے مقبول ہو رہی ہے، اسی وجہ سے لوگ بڑی تعداد میں پارٹی میں شمولیت اختیار کر رہے ہیں۔ ان کا کہنا تھا کہ آنے والا وزیر اعظم پیپلز پارٹی سے ہوگا۔
یہ بات انہوں نے تحریک انصاف راولپنڈی سٹی کے ڈپٹی انفارمیشن سیکرٹری ساجد قریشی سے ملاقات کے دوران کہی، جنہوں نے تحریک انصاف کے 15 رکنی وفد کے ہمراہ پیپلز پارٹی میں شمولیت کا اعلان کیا۔
گورنر پنجاب نے ساجد قریشی اور ان کے ساتھیوں کی شمولیت کا خیر مقدم کرتے ہوئے کہا کہ ان کی شمولیت سے راولپنڈی میں پیپلز پارٹی مزید فعال اور مضبوط ہوگی۔
ان کا کہنا تھا کہ پاکستان پیپلز پارٹی ملک کی سب سے بڑی اور عوامی جماعت ہے، جس نے ہمیشہ غریب اور مظلوم طبقے کے حقوق کے لیے آواز بلند کی ہے۔ انہوں نے کہا کہ پارٹی کی مقبولیت بڑھتی جا رہی ہے اور لوگ جوق در جوق اس میں شامل ہو رہے ہیں۔
گورنر نے کہا کہ پیپلز پارٹی نے ملک کے لیے عظیم قربانیاں دی ہیں، اور ان ہی قربانیوں کا نتیجہ ہے کہ آئندہ وزیراعظم بلاول بھٹو ہوں گے۔
انہوں نے اس بات پر زور دیا کہ حکومت کو پنجاب کے پسماندہ اور دور دراز علاقوں میں صحت، تعلیم اور دیگر بنیادی سہولیات کی فراہمی کے لیے ٹھوس اقدامات اٹھانے ہوں گے۔
پیپلز پارٹی میں شامل ہونے والوں میں حامد عباسی، بابر محمود، جاوید اقبال، ڈاکٹر شکیل، علی رضا، امجد جاوید، جہانگیر خان، حمزہ عباسی، بدر ستی، راجہ تنویر، راجہ خالد، راجہ حفیظ اور سردار ندیم شامل ہیں۔ اس موقع پر پیپلز پارٹی راولپنڈی سٹی کے صدر راجہ کامران، اسد پرویز اور عرفان حیدر بھی موجود تھے۔