پنجاب میں چینی کی فروخت بند کرنے کا اعلان، کریانہ ایسوسی ایشن کا حکومت پر شدید احتجاج

پنجاب: مرکزی کریانہ مرچنٹس ایسوسی ایشن نے پنجاب بھر میں چینی کی فروخت بند کرنے کا اعلان کر دیا ہے، کیونکہ صوبے میں چینی کی قیمتوں میں شدید اضافہ اور بحران شدت اختیار کر چکا ہے۔
تنظیم کے صدر حافظ عارف گجر نے کہا کہ مہنگی چینی خرید کر سستی قیمت پر فروخت کرنا ممکن نہیں رہا۔ انہوں نے حکومت اور انتظامیہ پر تنقید کرتے ہوئے کہا کہ سرکاری نرخ 165 روپے فی کلو چینی کی فراہمی میں ناکامی ہوئی ہے۔
انہوں نے کہا کہ حکومت نے ایکس شوگر ملز کو 165 روپے فی کلو چینی کی قیمت مقرر کی ہے، لیکن اس پر عمل درآمد نہیں ہو رہا۔ جب تک ملز اور ڈیلرز کے ساتھ کریانہ مرچنٹس کے لیے مناسب قیمتوں کا نظام وضع نہیں کیا جاتا، چینی کی فروخت بند رہے گی۔
عارف گجر نے بتایا کہ انتظامیہ نے چینی کی سرکاری قیمت پر فراہمی یقینی بنانے کی بجائے دکانوں پر سیلز روکنے اور بھاری جرمانے عائد کرنے کا سلسلہ شروع کر دیا ہے۔
انہوں نے مطالبہ کیا کہ حکومت اپنے وعدے کے مطابق 165 روپے فی کلو چینی فراہم کرے تاکہ وہ 173 روپے فی کلو کے حساب سے فروخت کر سکیں۔
مرکزی کریانہ مرچنٹ ایسوسی ایشن نے اعلان کیا ہے کہ 22 جولائی سے پنجاب بھر میں چینی کی خوردہ فروخت بند رہے گی۔