ایف آئی اے میں انسانی اسمگلنگ، طلال چوہدری نے بتایا اعداد و شمار

اسلام آباد: وزیر مملکت برائے داخلہ سینیٹر طلال چوہدری نے سینیٹ اجلاس میں بتایا کہ صرف 2024 میں ایف آئی اے کے 41 اہلکار انسانی اسمگلنگ میں ملوث ہونے پر نوکری سے برطرف کیے گئے، جبکہ 63 افراد مختلف مقدمات میں نامزد ہوئے۔
ڈپٹی چیئرمین سید سیدال خان کی زیر صدارت اجلاس میں اظہار خیال کرتے ہوئے سینیٹر شہادت اعوان نے پوچھا کہ ایف آئی اے کے 51 اہلکار جو برطرف کیے گئے، ان میں سے کسی کو سزا دی گئی یا نہیں۔
اس پر طلال چوہدری نے جواب دیا کہ 2024 میں برطرف کیے گئے 41 افراد کے علاوہ 63 افراد مختلف مقدمات میں نامزد ہوئے جن میں سے صرف 16 بری ہوئے، اور ان کی بریت کے خلاف بھی پراسیکیوشن اپیلیں دائر کی گئی ہیں۔
سینیٹر دنیش کمار نے سوال اٹھایا کہ زیادہ تر چھوٹے گریڈ کے اہلکار برطرف کیے گئے، لیکن 17 گریڈ سے اوپر کے کتنے افسران کو سزا دی گئی؟
طلال چوہدری نے جواب دیا کہ برطرف کیے گئے افراد میں اسسٹنٹ ڈائریکٹرز بھی شامل ہیں اور انہوں نے وعدہ کیا کہ بری ہونے والے افراد کی فہرست بھی فراہم کر دی جائے گی۔