چھببیس نومبر احتجاج؛ بشریٰ بی بی، عمر ایوب سمیت پی ٹی آئی رہنماؤں کی ضمانت میں توسیع

اسلام آباد: انسداد دہشت گردی کی عدالت نے 26 نومبر کے احتجاج سے متعلق کیس میں پی ٹی آئی کی رہنما بشریٰ بی بی، عمر ایوب اور دیگر رہنماؤں کی ضمانت قبل از گرفتاری میں توسیع کر دی ہے۔
عدالت نے متعلقہ مقدمات میں پولیس کو 13 نومبر تک گرفتاری سے روک دیا۔ اس سماعت میں جج ابوالحسنات محمد ذوالقرنین نے کیس کی نگرانی کی اور شیر افضل مروت، سابق وزیراعظم آزاد کشمیر عبدالقیوم نیازی سمیت دیگر رہنما پیش ہوئے۔
عمر ایوب، زرتاج گل اور دیگر کی حاضری سے استثنا کی درخواستیں عدالت نے منظور کر لیں۔ واضح رہے کہ پی ٹی آئی رہنماؤں کی مجموعی طور پر 240 سے زائد ضمانتیں زیر سماعت ہیں۔ عدالت نے اگلی سماعت پر فریقین کو دلائل پیش کرنے کی ہدایت بھی کی۔
پی ٹی آئی رہنماؤں کے خلاف تھانہ رمنا، سنگجانی، ترنول اور دیگر علاقوں میں مقدمات درج ہیں۔