اسلام آباد: بانی پاکستان تحریکِ انصاف اور ان کی اہلیہ بشریٰ بی بی نے توشہ خانہ ٹو کیس میں ٹرائل روکنے اور اپیل کی جلد سماعت کے لیے اسلام آباد ہائیکورٹ میں درخواست دائر کر دی ہے۔
یہ اپیل بیرسٹر سلمان صفدر اور خالد یوسف چوہدری کے ذریعے دائر کی گئی ہے، جس میں مؤقف اختیار کیا گیا کہ ٹرائل کورٹ نے نومبر 2024 میں بریت کی درخواست مسترد کی تھی اور اس کے خلاف 21 جنوری 2025 کو اپیل دائر کی گئی۔
درخواست میں کہا گیا ہے کہ اپیل کی سماعت میں تاخیر سے درخواست گزار کے بنیادی حقوق متاثر ہونے کا خدشہ ہے، جبکہ ٹرائل کورٹ غیر معمولی تیزی سے کارروائی آگے بڑھا رہا ہے۔
درخواست گزار کا مؤقف ہے کہ اگر اپیل کے فیصلے سے قبل ٹرائل مکمل ہو گیا تو اپیل کا فائدہ ختم ہو جائے گا، اسی لیے عدالت سے استدعا کی گئی ہے کہ اپیل کے فیصلے تک ٹرائل معطل رکھا جائے۔
