لاہور: پنجاب میں دریائے راوی، ستلج اور چناب میں سیلاب کے باعث بڑے پیمانے پر نقصان پہنچا ہے۔ پی ڈی ایم اے پنجاب کی تازہ رپورٹ کے مطابق اب تک 43 شہری جاں بحق ہوچکے ہیں جبکہ 3300 سے زائد موضع جات متاثر ہوئے ہیں۔ سیلاب سے مجموعی طور پر 33 لاکھ 63 ہزار افراد متاثر ہوئے اور 12 لاکھ 92 ہزار افراد کو محفوظ مقامات پر منتقل کیا گیا۔
شدید سیلاب سے متاثرہ علاقوں میں 405 ریلیف کیمپس، 425 میڈیکل کیمپس اور 385 ویٹرنری کیمپس قائم کیے گئے ہیں، جن میں 7 لاکھ 99 ہزار جانور بھی محفوظ مقامات پر منتقل کیے گئے۔ منگلا ڈیم 83 فیصد، تربیلا ڈیم 100 فیصد، انڈین بھاکڑا ڈیم 84 فیصد، پونگ ڈیم 98 فیصد اور تھین ڈیم 92 فیصد تک بھر چکے ہیں۔
ریلیف کمشنر نبیل جاوید کا کہنا ہے کہ وزیر اعلیٰ پنجاب کی ہدایات کے مطابق شہریوں اور کسانوں کے نقصانات کا ازالہ یقینی بنایا جائے گا۔ گزشتہ 24 گھنٹوں میں پنجاب کے مختلف اضلاع میں مون سون بارشیں ریکارڈ کی گئی ہیں، جس میں سیالکوٹ 101 ملی میٹر، گجرانوالہ 59، گجرات 48، نارووال 41، لاہور 14، مری 12، منڈی بہاالدین 4، حافظ آباد 2 اور فیصل آباد 1 ملی میٹر شامل ہیں۔ آئندہ 24 گھنٹوں میں بھی مون سون بارشوں کی پیشگوئی ہے۔
