پشاور: حسن خیل کے علاقے میں واقع پولیس پوسٹ سپین میلہ پر دہشت گردوں کے حملے میں ایک پولیس کانسٹیبل شہید ہوگیا، جبکہ پولیس کی جوابی کارروائی کے بعد حملہ آور فرار ہونے میں کامیاب ہوگئے۔
سی سی پی او پشاور میاں سعید کے مطابق گزشتہ رات دہشت گردوں نے حسن خیل میں پولیس پوسٹ سپین میلہ کو نشانہ بنایا، جس کے نتیجے میں ایک کانسٹیبل نے جامِ شہادت نوش کیا۔
میاں سعید کا کہنا ہے کہ پولیس اہلکاروں نے حملے کے جواب میں بھرپور فائرنگ کی، جس کے بعد دہشت گرد موقع سے فرار ہوگئے۔ جوابی کارروائی کے دوران متعدد حملہ آوروں کے زخمی ہونے کی اطلاعات بھی موصول ہوئی ہیں۔
سی سی پی او پشاور کے مطابق فرار ہونے والے دہشت گردوں کی گرفتاری کے لیے تلاش جاری ہے، جبکہ واقعے کے بعد سکیورٹی اقدامات مزید مؤثر بنانے پر توجہ دی جا رہی ہے۔
